Ido-estaleyo che la linguoferio "EXPOLINGUA 2008" en Berlin
Kara Idisti,
191 expozanti de 33 landi partoprenis ye la linguo-ferio.
14.800 interesemi informis su pri cirkume 60 lingui.
Mikra kurseti eventis en Japona, Araba, Finnlanda e Franca.
Nova moyeni pri komunikado esis prizentita, exemple reala komunikado per *video kun la Filipinia.-
Yen, kurte, ulo ek la oficala komunikado
Sioro Schlemminger diskursis koram sua askoltanti per "Beamer" e respondizis la questioni di kuriozi.
Nia estaleyo esis ornita per du granda afishi, per la konocata "Bona jorno, hier ist Ido"
e per la kompleta serio di difuzili kreita da nia fervoroza samideano Adrian Pastrana.
Ankorfoye, kara Adrian, gratitudo a vu.
|
L'Ido-estaleyo kun diversa propagili |
Ni povis prizentar Ido-revui anciena ed aktuala, por exemplo anke "Adavane" e "Kuriero Internaciona" bel-aspektanta.
La tota dokumentaro esis internaciona.
Regretinde ni ne povis skribar ula statistiko pri la nombro e lingui di nia vizitanti o gasti. Ni nur povas protokolar ulo ek nia rimemoro.
Yen la listo di la lingui che nia estaleyo, certe ne-kompleta:
Estona, Lituana, Belarusa, Rusa, Bulgara, Rumana, Hungara, Slovena, Slovaka, Albana, Moldava, Cheka, Polona, Italiana, Hispana, Portugala, Baska, Franca,
Nederlanda, Angla, Skota, linguo Irlanda, Dana, Turka, Koreana, Indiana.
Vi povas konjektar ke nia ne-German samideano, qua unesmafoye partoprenis ca linguoferio en nia estaleyo, povis atestar lua savo pri est-Europana
lingui.
Vlado de Warszawa diskutis kun plu multa kam dek personi. Lua espero esos profesorino Polona... .
|
Eberhard Scholz (dextre) e Rudolf Gensch (sinistre) diskutis kun vizitantini dil linguoferio. Maxim sinistre videblas Vlado Yakowenko di Polonia |
Ma nia parteneri konversinta venis anke de la fora mondo : De la multa landi Hispanlingua en Latinamerika, exemple Kostarika e Brazilia. Ultre to, anke Usani e Kanadiani.
Tre interesiva esis la diskuto kun Marokino: Ido, ka vere mondolinguo?
Pluse un muliero de Iran raportis a ni pri la yunaro Irana, qua esas tre "apertita vers la mondo".
Senproblema esis la relati inter la same partopreninta Esperantisti e nia esquado.
Nia adverso ne esas la linguo di nia mi-frati ma la hegemonio di ula linguo nacionala.
Respekto e tolero guvernas dum la paroladi anke en Esperanto.
La chefa questiono di la maxim multa Germani koncernis la frazeto "Was ist Ido?" ( Quo esas Ido?).
Omni recevis ne nur propagili, produktita dal Idoamiki Berlin. La propagili esis havebla en la lingui
Hispana, Franca, Angla, Germana, Rusa e Polona. La interesemi anke invitesis a nia kunveneyo por pluse babilar, por lernar Ido o mem kunluktar
favore la "maxim bela afero di la mondo".
Surprizante ed unesmafoye instruktisti di skoli serchis kontakto a ni.
Pluse esis joyiva, ke skolani, gimnaziani e studianti questionis kurioze ni. Interesanta personi povis enskribar su en anuncili.
Pos omno -- ni nun expektas eko.
Tamen e malgre omno, la mondo -- o plu modesta -- la publikeso devas saveskar pri l'existo dil Ido.
Yen quaza rezumo pri tri jorni penoza de senfina diskuti .
Me salutas vi
Eberhard