• Artikel
• Bearbeiten
• Versionen
• Druckansicht

Fatigite e kontente ni rezumas, la cayara ferio di lingui EXPOLINGUA itere esis sucesoza por la Idisti. Unesmafoye kelka propagili de la 8 lingui, la Germana e la Rusa, esis exhaustita. 13086 vizitanti promenadis preter la estaleyi di la precize 182 expozanti ek 26 landi, qui ofris grandega sinop­tikajo pri la diversa moyeni di la lernado e di la docado di stranjera lingui.  Ye la Ido-estaleyo Ferdinand, Günter, Hans-Georg, Rudolf ed Eberhard de la Idoamiki Berlin informis, diskutis ed explikis dum 3 jorni. La Berlinan Idisti esis sustenata energioze da d-ro D. Groth e D. Schmidtchen de Hesia. D. Schmidtchen esis akompananta da sua amba amiki Etopiana.

Pri to la kuriozi questionis precipue:
Quo es Ido? Pro quo plusa linguo ultre Esperanto? Pro quo ne l´Angla ja vaste difuzata kom mondolinguo?
Kad Ido anke povas reprezentar la kulturi di Azia ed Afrika? Kad ol esez mondlinguo?

Un respondon donis d-ro Groth anke dum sua diskurso durinta 45 minuti. Ta diskurso esis un kulmino-punto dum nia Ido-pri­zentado. Un plusa kulmino esis la broshuro “Franca kalidoskopo” da la Berlinana Idisto G. Schlemminger. Sur la expozal tablo esis ofrata anke la ´Diario di Anne Frank´, ´Preske en karcero´, tradukuro di kriminala naraco da Horst Bosetzky, la chefo di la Berlinana societo por skriptisti. Balde esis exhaustita la 120 120 Ido-kalendarii por 2011, kreita da d-ro Groth. Kompreneble la Berlinan Idisti serchis kontakti al altra expozinti: la Ger­man expozeyi di la surdi, di la Sorabi, dil Esperantisti, di la societani por la Germana linguo. Ni kontaktis anke multa Hispaniani, la Baski, la Kataluni, la Galisiani, Andaluziani, Asturiani. Regretinde ni ne povas mecionar omna kontakti. Anke Esperantisti exterlanda vizitis la Ido-estaleyo.

La kulturala programo dil Expolingua kontenis inter altri la ´Tango Argentino´, qua prizentesis da dancisti di Arjentinia.

La chefa expozanto dil EXPOLINGUA esis Chinia.

Ni, la Idoamiki Berlin, future invitos stranjera Idisti, qui sustenos ni per lia nacionala lingui por ganar plusa entuziasmozi ek la tota mondo.

Nam, de-ube venis nia konversanti?

Nord-Amerika:

• Usa, Kanada

Sud-Amerika:

• Mexikia, Brazilia, Venezuela, Arjentinia

Azia:

• Japonia, Sudkorea, Chinia, Siria, Iran, Turkia

Europa:

• Hispania, Portugal, Francia, Granda Britania, Norvegia, Suedia, Dania,
  Finlando, Polonia, Chekia, Austria, Kroatia, Grekia, Suisia, Italia

Olima parti di Sovietuniono:

• Belorusia, Lituania, Ukrainia, Rusia, Kaukaziana landi

Hike trovesas kelka fotografuri facita ye l'informestaleyo

Eberhard Scholz
Idoamiki Berlin

Zurück zur Startseite der Idoamiki Berlin - Retro a la frontispico dil Idoamiki Berlin
Zurück zur Startseite der Deutschen Ido-Gesellschaft - Retro a la frontispico dil Germana Ido-Societo
Retro a la frontispico di ULI